اسلام آباد:
وزیر خارجہ شاہ محمود قریشی نے کہا کہ اس وقت مہنگائی ہمارا بہت بڑا چیلنج ہے۔
اپنے بیان میں شاہ محمود قریشی نے کہا کہ اس میں کوئی شک نہیں کہ اس وقت مہنگائی ہمارا بہت بڑا چیلنج ہے، وزیر اعظم عمران خان خود اس چیلنج سے نمٹنے کیلئے سرگرم عمل ہیں، اس سلسلے میں تمام ممکنہ اقدامات اٹھائے جا رہے ہیں تاکہ عوام کو مہنگائی کے چنگل سے نجات دلائی جا سکے، انشاء اللہ جلد اس مہنگائی پر قابو پا لیں گے۔
وزیر خارجہ کا کہنا تھا کہ ایف بی آر کی کارکردگی ماضی کے مقابلے میں بہت بہتر دکھائی دیتی ہے، ایف بی آر میں ابھی اصلاحات کی ضرورت ہے تاکہ تجوریوں میں منتقل ہونے والا پیسہ قومی خزانے میں جمع ہو سکے اور وسائل میں اضافہ ہو-
اپوزیشن پر تنقید کے حوالے سے شاہ محمود قریشی نے کہا کہ پی ڈی ایم سمجھتی ہے کہ احتساب کا شکنجہ ان کے قریب تر ہوتا جا رہا ہے، اس لئے پی ڈی ایم حکومت پر این آر او کے حصول کے لئے دباؤ ڈالنا چاہتی ہے پی ڈی ایم اپوزیشن جماعتوں کا ایک غیر فطری اور عارضی اتحاد ہے، یہ ایک دوسرے کو بچانے کے لئے کوشاں ہیں لیکن ان کے مفادات مختلف ہیں، پیپلزپارٹی دباؤ چاہتی ہے لیکن سندھ حکومت کی قربانی دینے سے گریزاں ہے ۔ پاکستان تحریک انصاف انتقامی سیاست پر یقین نہیں رکھتی، ہم قانون اور آئین کے تحت کاروائی پر یقین رکھتے ہیں، سرکاری زمینوں پر قبضے ہوئے ہیں حتی کہ قبرستانوں کو مسمار کر کے قبضے کی روایات ڈالی گئیں۔
کورونا ویکسین کے حوالے سے وزیر خارجہ نے کہا کہ مجھے بے حد خوشی ہے کہ ہمارے دیرینہ اور گہرے دوست چین نے ایک دفعہ پھر ہمیں ترجیحی بنیادوں پر ویکسین ڈوزز کا تحفہ بھیجا ہے،ہم چین کی حکومت کے بے حد شکر گزار ہیں، میری اس حوالے سے دسمبر اور جنوری میں چینی وزیر خارجہ وانگ ژی سے گفتگو ہوئی تھی اور میں نے انہیں پاکستان کی ضرورت سے آگاہ کیا تھا۔ انہوں نے مجھ سے کہا کہ ہم پاکستان کے ساتھ دو طرفہ تعلقات کی نوعیت کو سامنے رکھتے ہوئے سب سے پہلی ویکسین کھیپ پاکستان کو ارسال کرنا چاہتے ہیں،مجھے خوشی ہے کہ ہمارا جہاز چین سے ویکسین کی پہلی کھیپ لے کر پاکستان پہنچ چکا ہے۔
The post کوئی شک نہیں کہ اس وقت مہنگائی بہت بڑا چیلنج ہے، شاہ محمود قریشی appeared first on ایکسپریس اردو.
from ایکسپریس اردو » پاکستان https://ift.tt/39yFXDJ