کراچی: سندھ اسمبلی میں اپوزیشن لیڈر اور تحریک انصاف کے رہنما فردوس شمیم نقوی وزیراعظم اور ان کی ٹیم پر تنقید کرنے پر مشکل میں پڑگئے۔
اپوزیشن لیڈر فردوس شمیم کو وزیراعظم اوروفاقی وزراء کوشرم دلانا مہنگا پڑگیا۔ پی ٹی آئی کی وفاقی حکومت سندھ میں اپنے اپوزیشن لیڈر فردوس شمیم نقوی سے ناراض ہوگئی۔
مرکزی قیادت نے فردوس شمیم نقوی سے استعفیٰ طلب کرتے ہوئے کہا ہے کہ وہ فوری طور پر استعفی دے دیں۔ پارٹی قیادت فردوس شمیم سے وزیراعظم اور عمر ایوب کے بارے میں گیس معاملے پر دیئے گئے بیان پر ناراض ہے۔ سندھ میں گیس بحران پرایس ایس جی سی آفس کے باہر فردوس شمیم اپنی ہی وفاقی حکومت پر برس پڑے تھے۔
یہ بھی پڑھیں: گیس بحران پرفردوس شمیم نقوی نے وزیر اعظم کو شرم وحیا یاد دلادی
فردوس شمیم نقوی نے عہدہ بچانے کے لیے بھاگ دوڑ شروع کردی۔ انہوں نے اپنی جماعت کے ایم پی ایز سے رابطہ کرکے اپنے حق میں اور معافی کے لئے خط لکھنے کی درخواست کردی۔
فردوس شمیم کے حامی ایم پی ایز نے انہیں حمایت کا یقین دلادیا جبکہ مخالفین نے موقع سے فائدہ اٹھاتے ہوئے انہیں ہٹانے کا فیصلہ کیا ہے۔ فردوس شمیم نقوی کے بیان نے اپنے پیروں پر کلہاڑا مارنے اور جلتی پر تیل کا کام کردیا۔
سندھ اسمبلی میں پارلیمانی لیڈر حلیم عادل شیخ بھی فردوس شمیم سے نالاں ہیں جبکہ حلیم عادل شیخ قیادت کے دباؤ کے باعث فردوس شمیم کی مصنوعی حمایت پر مجبور تھے۔ موجودہ صورتحال میں خرم شیرزمان نے بھی خاموشی اختیار کرلی۔
The post وزیراعظم کو تنقید کا نشانہ بنانے پر فردوس شمیم نقوی سے استعفیٰ طلب appeared first on ایکسپریس اردو.
from ایکسپریس اردو » پاکستان https://ift.tt/33dArDl