کراچی: صوبائی محکمہ کالج ایجوکیشن کے تحت کراچی کے سرکاری کالجوں کے ایک لاکھ سے زائد طلبہ کے انٹرسال اول کے داخلے ڈپارٹمنٹ کی غفلت اورکمیٹی کی ناتجربے کاری کے سبب بدترین بدانتظامی کاشکار ہوکر آگے بڑھادیے گئے ہیں۔
ناتجربے کاری کے سبب کالجوں میں انٹرکے نئے سیشن 2018/19 میں کم از کم 8روزکی تاخیرکردی گئی جبکہ محکمے کی غفلت اور لاپرواہی کے باعث نجی پارٹی نے مرکزی داخلہ کمیٹی کی ویب سائٹ https://ift.tt/2Pr3NVb عدم ادائیگی پر بند کر دی ہے۔
دوسری جانب محکمہ اسکول ایجوکیشن کے تحت داخلوں کے سلسلے میں چلنے والی ویب سائٹ https://ift.tt/1mfNE0u زیادہ ’’ٹریفک‘‘ پر خراب ’’لوڈ مینجمنٹ‘‘ کے باعث کام چھوڑ چکی ہے اور ویب سائٹ نے فارم ڈاؤن لوڈ کرنے کی صورت میں 502 کی خرابی (error) کو ظاہر کرنا شروع کردیاہے جس کے سبب داخلوں کا پورا مرحلہ بری طرح ناکام اور سرکاری کالجوں میں 7 ماہ پرمحیط انٹرسال اول کاسیشن اب ساڑھے 6 ماہ پرمحدود ہوگیاہے۔
دوسری جانب فارم جمع کرانے سے محروم ہزاروں طلبا وطالبات شدیدذہنی کوفت وپریشانی سے دوچارہیں تاہم اس تمام صورتحال کے باوجود سندھ کے صوبائی وزیرتعلیم سردارشاہ کی جانب سے اس معاملے پرکوئی نوٹس لیاگیاہے اورنہ ہی طلبہ کے مفاد میں کوئی حکمت عملی تیارکی گئی ہے۔
واضح رہے کہ محکمہ کالج ایجوکیشن کی جانب سے کراچی سمیت سندھ بھرکے سرکاری کالجوں میں انٹرسال اول کے داخلوں کے سلسلے میں آن لائن داخلہ فارم جمع کرانے کی آخری تاریخ 5ستمبرجبکہ تدریسی عمل کاآغاز10ستمبرسے کیاجاناتھاتاہم اب داخلہ کمیٹی نے آن لائن داخلہ فارم جمع کرانے کی آخری تاریخ 12 ستمبر کردی ہے اورسیشن میں تاخیرکرتے ہوئے کلاسز کے آغاز کی نئی تاریخ 18ستمبرمقررکی ہے ریجنل ڈائریکٹر کالجز کراچی اورکیپ کے سربراہ پروفیسرمعشوق بلوچ نے دونوں تاریخوں میں توسیع کی تصدیق کردی ہے۔
یادرہے کہ گزشتہ برس مرکزی داخلہ کمیٹی کی جانب سے انٹرسال اول میں داخلوں کے سلسلے میں تمام فیکلٹیزکی ’’پلیسمنٹ لسٹ ‘‘5 ستمبر تک جاری کر دی گئی تھی اور کلاسز کا آغاز بتدریج ستمبرکے دوسرے عشرے کے آغاز سے ہی ہو گیا تھا کالجوں میں سیشن پہلے ہی ستمبر سے شروع ہو کر مارچ میں ختم ہو جاتا ہے اور اپریل کے آخری عشرے میں انٹرکے امتحانات شروع ہو جاتے ہیں تاہم اب سیشن کے آغازمیں مزید تاخیر اور دورانیے میں کمی آ گئی ہے جس سے براہ راست انٹر کے طلبہ متاثر ہوں گے اور پرائیویٹ ٹیوشن سینٹرکی چاندی ہو جائے گی۔
’’ایکسپریس‘‘ کو ذرائع نے بتایاکہ محکمہ کالج ایجوکیشن نے مرکزی داخلہ کمیٹی کے تحت انٹرسال اول کے داخلوں کے سلسلے میں اسکول ایجوکیشن کی ویب سائٹ کے ساتھ ساتھ اپنی ویب سائٹ شروع کرتے ہوئے ایک پرائیویٹ پارٹی سے کئی لاکھ روپے کاکنٹریکٹ کیامتعلقہ پارٹی کوکالج ایجوکیشن ڈپارنمنٹ میں دفتربھی دیا گیا۔
معاہدے کے مطابق ادائیگی نہیں کی جاسکی جس کے سبب متعلقہ پارٹی واپس چلی گئی اورویب سائٹ بند کردی اورویب سائٹ پر باقاعدہ اعلامیہ لکھ دیاکہ ’’محکمہ کالج ایجوکیشن حکومت سندھ کی ویب سائٹ عدم ادائیگی کے سبب معطل ہے‘‘جس کے سبب تمام ٹریفک اسکول ایجوکیشن کی ویب سائٹ کی جانب چلا گیا تاہم یہ ویب سائٹ بھی نامناسب لوڈ مینجمنٹ کے سبب شدید متاثر ہے۔
The post انٹر داخلے وقت پر مکمل نہ ہونے سے تعلیمی دورانیہ مزید محدود appeared first on ایکسپریس اردو.
from ایکسپریس اردو » پاکستان https://ift.tt/2PrI4g1