کوہاٹ: رشتے سے انکار پر قتل ہونے والی طالبہ عاصمہ کی بہن کا کہنا ہے کہ ملزم مجاہد نے پہلے بھی عاصمہ کو جان سے مارنے کی دھمکیاں دی تھیں۔
کوہاٹ میں رشتہ سے انکارپر بے دردی سے قتل ہونے والی عاصمہ کی بہن صفیہ نے اپنے بیان میں کہا کہ روزانہ پاکستان میں قتل کی وارداتیں ہورہی ہیں جس کے خلاف حکومت نے کوئی کارروائی نہیں کی۔ قصور میں زینب ، مردان میں اسما اور کراچی میں نقیب اللہ کے بعد میری بہن کو بھی ماردیا گیا، میری بہن نے نزاعی بیان دیا ہے کہ مجاہد نے اسے قتل کیا ہے، ملزم نے پہلے بھی مجھے فون کرکے بہن کو جان سے مارنے کی دھمکیاں دی تھیں۔
صفیہ نے کہا کہ مجاہد پہلے سے شادی شدہ تھا، اگر رشتہ نہیں دیا تو کیا قتل کرنا ضروری تھا، ضروری نہیں کہ جورشتہ مانگے اس سے شادی کرادی جائے، پولیس غریب آدمی کوپکڑتی ہے مالدارکو ہاتھ نہیں لگاتی، عمران خان کی حکومت اورتمام پاکستانی عوام سے مدد کی اپیل کرتی ہوں۔
اس خبرکوبھی پڑھیں: چیف جسٹس نے عاصمہ قتل کیس کا ازخود نوٹس لے لیا
بہن صفیہ نے اپنے بیان میں کہا کہ ہم غریب ہیں بڑی مشکل سے بہن کو تعلیم دلوا رہے تھے، بیرون ملک مزدوری کر رہی ہوں اور بہن کی تعلیم کا خرچہ برداشت کررہی تھی، عاصمہ نے مجھے کہا تھا کہ باجی جب آپ وطن واپس آئیں گی تو میں ڈاکٹر بن چکی ہوں گی، لیکن ڈاکٹربننے سے پہلے ظالموں نے میری پھول جیسی بہن کوقتل کیا اوراگر قاتلوں کوسزا نہ ہوئی تو تمام لوگ گنہگارہوں گے ، ابھی تک ہماری کسی نے مدد نہیں کی۔
واضح رہے کہ میڈیکل کی طالبہ عاصمہ بی بی کو تحریک انصاف کے ضلعی صدرکے بھتیجے مجاہد آفریدی نے شادی سے انکار پر فائرنگ کرکے قتل کردیا تھا اوربعد ازاں وہ سعودی عرب فرارہوگیا۔ چیف جسٹس میاں ثاقب نثار نے واقعے کا ازخود نوٹس لے لیا ہے۔
The post عاصمہ کو ملزم نے پہلے بھی قتل کی دھمکیاں دی تھیں، بہن صفیہ appeared first on ایکسپریس اردو.
from ایکسپریس اردو » پاکستان http://ift.tt/2Eri6VG