کراچی: پولیس کے اسپیشل انویسٹی گیشن یونٹ نے سائٹ سے گزشتہ 10سال سے اسٹریٹ کرائم اور ڈکیتیوں میں شہریوں کو لوٹنے والے2 خطرناک ڈاکوؤں کو گرفتار کرکے اسلحہ برآمد کرلیا۔
تفصیلات کے مطابق اسپیشل انویسٹی گیشن یونٹ پولیس نے سائٹ ایریا نورس چورنگی کے قریب سے 2 ڈاکوؤں امجد علی ولد عطا محمد اور زاہد علی ولد راضی خان کو گرفتارکرکے ان کے قبضے سے اسلحہ برآمد کرلیا، ڈاکوؤں نے 10 سال کے دوران اسٹریٹ کرائم اور ڈکیتیوں کے دوران موبائل فونز، طلائی زیورات، اے ٹی ایم سے رقوم لے کر نکلنے والوں کو لوٹنے اور واردات کے دوران مزاحمت کرنے پر شہریوں کو گولیاں مارکر زخمی کرنے کا اعتراف کیا ہے، گرفتار ملزمان کئی بار گرفتار ہوئے اور ضمانت کے بعد جیل سے رہا ہوگئے۔
گرفتار ڈکیت عزیزبھٹی، شارع فیصل، گلستان جوہر اور پریڈی تھانوں میں درج مقامات میں اشتہاری قراردیے جاچکے ہیں، اسپیشل انویسٹی گیشن یونٹ پولیس کے مطابق گرفتار ملزمان اپنے ڈکیت ساتھیوں علی رضا ، کاشان، مبین اور ثاقب کے ہمراہ مختلف وارداتوں میں ملوث اور مطلوب ہیں ایس آئی یو پولیس کے مطابق ملزمان نے سال2012 اور سال2013 میں زاہد نے ثاقب کی موٹرسائیکل پر واردات کی تھی جس میں ایک عورت زخمی ہوگئی تھی ملزم زاہد موٹرسائیکل چھوڑ کر فرار ہوگیا تھا پولیس نے ثاقب کے بھائی ذوالفقار کو گرفتار کرلیا تھا سال 2012 اور 2013 میں ثاقب اور علی رضا جوہر موڑ کے قریب شاہراہ فیصل پولیس کے ہاتھوں مقابلے میں زخمی حالت میں پکڑے گئے تھے اور بعد میں عدالت سے ضمانت پر رہا ہو گئے تھے۔
ملزمان نے 2014 میں گلستان جوہر میں گاڑی سوار جج سے موبائل فون اور 35 ہزار روپے لوٹے تھے2015 میں ملزم زاہد کا بھانجا عمران کراچی سے کار چوری کرکے سیہون لے گیا تھا جہاں ملزمان پکڑے گئے تھے،2015 میں زاہد امجد، علی رضا اور ثاقب نے سفاری پارک کے قریب مزاحمت پر شہری کو فائرنگ کرکے زخمی کیا، ملزمان نے 2016 میں جوہرکمپلیکس کے قریب گاڑی میں سوار خواتین سے2 سونے کی انگوٹھیاں، موبائل فونز، بریسلٹ، سونے کی چین اور8500 روپے اسلحہ کے زور پر لوٹے تھے۔
ملزمان نے 2016 میں یونیورسٹی روڈ پر گاڑی میں سوار شہری سے موبائل فون اور11 ہزار روپے لوٹے، 2017 میں سچل تھانے کی حدودگلستان جوہر کامران چورنگی کے قریب لوٹ مار کے دوران مزاحمت پر ایک شخص کو گولی مارکر زخمی کیا،2017 میں زاہد، امجد اور علی رضا نے کامران چورنگی پر موٹر سائیکل سوار شہری سے 15 ہزار روپے اور 2 موبائل فون لوٹے،2017 میں زاہد اورعلی رضا نے صفورہ چورنگی کے قریب موٹر سائیکل سوار شہری سے 5 ہزار روپے اور ایک موبائل فون لوٹا تھا،2017 زاہد اور ثاقب نے جوہر کمپلکس کے پاس کار میں سوار فیملی سے طلائی زیورات، گھڑی،2 موبائل فون اور 5 ہزار روپے لوٹے، 2017 میں گلستان جوہر میں اے ٹی ایم سے رقم نکلوانے والے شخص سے 18 ہزار روپے چھین کر فرار ہوگئے۔
2017 میں زاہد، امجد اور علی رضا نے گلستان جوہر میں یوبی ایل سے رقم لے کر نکلوانے والے سے 19ہزار روپے اور موبائل فون لوٹے2017 میں امجد اور علی رضا نے کامران چورنگی سے آگے موڑ پر کار سوار شہری سے رقم اور موبائل فونز لوٹے، 2017 میں امجد اور علی رضا نے موسمیات کے قریب گاڑی میں سوار شہری سے موبائل فونز اور17 ہزار کی رقم چھینی،2017 میں امجد اور علی رضا نے سمامہ شاپنگ سینٹر کے قریب سے کار میں سوار فیملی سے23 ہزار روپے اور2 موبائل فون لوٹے،2017 میں امجد اور علی رضا نے میٹرو بینک کی اے ٹی ایم سے رقم لے کر نکلوانے والے شہری سے 13 ہزار اور موبائل فون چھینے تھے۔
گارڈن پولیس نے کارروائی کرتے ہوئے تالا توڑ گروپ کے2کارندوں کو رنگے ہاتھوں گرفتار کرموبائل فونز، ٹیبلٹ اور تالے توڑنے کے اوزار برآمد کر لیے، گرفتار ملزمان کے 4 ساتھی موقع سے فرار ہوگئے،رینجرزنے شہر کے مختلف علاقوں میں کارروائی کرتے ہوئے2ملزمان کو گرفتارکر لیاگرفتار ملزمان ٹارگٹ کلنگ اور منشیات فروشی سمیت جرائم میں ملوث ہیں، تفصیلات کے مطابق ایس پی سٹی ڈویژن شہلا قریشی نے گارڈن تھانے میں پریس کانفرنس کے دوران بتایا کہ22 جنوری کی درمیانی شب گارڈن تھانے کے علاقے میں نورانی گارڈن کی مختلف دکانوں کے تالے توڑکر24 موبائل فون،ایک لاکھ 76 ہزار لوٹ کر فرار ہو گئے تھے جس کا مقدمہ درج کر کے ملزمان کی تلاش شروع کردی تھی۔
گزشتہ روز گارڈن پولیس نے اووررینج اسٹریٹ کامران اسکوائر کے قریب کارروائی کرتے ہوئے واردات میں ملوث تالا توڑ گروپ کے2 کارندے محمد شہزاد ولد محمد طیب اور محمد آصف ولد محمد یونس کو گرفتار کر کے11 موبائل فونز، 1 ٹیبلیٹ، اسلحہ، تھیلا، ہتھوڑا اور راڈ برآمد کر لیاجبکہ ملزمان کے 4 ساتھی اسامہ ،عمران، علی اور وکی موقع سے فرار ہو گئے،ایس پی سٹی ڈویژن کا کہنا ہے کہ گرفتار ملزمان محمد شہزاد گارڈن اور بنی بخش جبکہ محمدآصف سولجر بازار میں دہشت گردی سمیت دیگر دفعات کے تحت درج مقدمے میں مفرور تھا، انھوں نے بتایا کہ گرفتار ملزمان کے خلاف 2 مقدمات درج کر کے تفتیش شروع کردی گئی ہے۔
علاوہ ازیں ترجمان سندھ رینجرز کے مطابق رینجرز نے شاہ فیصل کالونی کے علاقے میں کارروائی کرتے ہوئے ملزم علی اکبر بنگش عرف کنگ علی کو گرفتار کیا، گرفتار ملزم ٹارگٹ کلنگ اور منشیات فروشی کی متعدد وارداتوں میں ملوث ہے ماڈل کالونی کے علاقے میں رینجرز نے کارروائی کرتے ہوئے ملزم فضل کو گرفتار کیا، ملزم ڈکیتی اور اسٹریٹ کرائم کی وارداتوں میں ملو ث ہے، ترجمان سندھ رینجرز کے مطابق ملزمان کے قبضے سے غیر قانونی اسلحہ، ایمونیشن اورمسروقہ سامان بھی برآمد کرلیا گیا ہے،ملزمان کو قانونی چارہ جوئی کے لیے پولیس کے حوالے کر دیا گیا ہے۔
The post 10 سال سے لوٹ مار میں مصروف 2 خطرناک ڈکیت گرفتار، اسلحہ برآمد appeared first on ایکسپریس اردو.
from ایکسپریس اردو » پاکستان http://ift.tt/2Fwe0e4